Mütəxəssislər bunu bazarlarda yaranan sabitliklə izah edirlər

Son vaxtlar bazarlarda yumurta və toyuq ətinin ucuzlaşması müşahidə edilir. Bir neçə həftə ərzində yumurta və toyuq ətinin qiyməti 20 faiz aşağı düşüb. Bunu bazarda yaranmış sabitliklə izah edən mütəxəssislər yaxın vaxtlarda həmin məhsulların qiymətində artım gözlənilmədiyini bildirirlər.

Azərbaycan Quşçular Cəmiyyətinin sədri Aydın Vəliyev də qiymətlərin ucuzlaşdığını qeyd etdi. Ucuzlaşmanın səbəbinə gəlincə, bu, xaricdən toyuq ətinin gətirilməsi ilə əlaqələndirilir. Əhali üçün sərfəli olsa da, yaranmış vəziyyət yerli quşçulara çətinlik yaradır. Artıq cənub bölgəsində bu sahə ilə məşğul olmaq broyler şirkətlərinə sərf etmir. Çünki İrandan gələn daha ucuz toyuq əti və yumurta həmin quşçuların məhsullarının yarısının soyuducularda qalmasına səbəb olur. Cəmiyyət sədri hesab edir ki, mövcud vəziyyəti dəyişmək üçün "Daxili bazar haqqında" qanun qəbul edilməlidir: "Əgər belə olarsa, yerli istehsalçılar məhsullarını daha yaxşı sata bilərlər. Quşçuların digər problemi də lazımi texnologiyanın,yemin və damazlıq yumurtanın böyük bir qisminin xaricdən gətirilməsidir. Asılılığı azaltmaq məqsədi ilə artıq bir çox broyler damazlıq yumurtanı özləri istehsal etməyə üstünlük verir. Buna artıq bir çox quşçuluq müəssisələrində başlanılıb".
Bütün çətinliklərə baxmayaraq, 2008-2015- ci illəri əhatə edən Ərzaq Təhlükəsizliyi Proqramı çərçivəsində toyuq ətinin 80 min tona, yumurta istehsalının isə 1,3 milyard ədədə çatdırılması planlaşdırılıb. Məsələyə münasibət bildirən A.Vəliyev qeyd etdi ki, bu proqnozların doğrulması üçün ilk olaraq ölkədəki quşçuluq müəssisələrinin vəziyyəti yaxşılaşdırılmalıdır: "Hökumətə təqdim edilən təkliflərə görə, Azərbaycana xaricdən gətirilən quş əti və yumurtanın həcmi məhdudlaşdırılmalıdır. Hazırda xaricdən gətirilən məhsullar ölkənin quş ətinə olan tələbatının 40 faizini ödəyir. Tələbatın 60 faizi isə yerli müəssisələrin hesabına təmin olunur. Əgər dəstək göstərilsə, yerli quşçuluq müəssisələri 2015-ci ilədək ölkənin bütün tələbatını yerli məhsullar hesabına ödəyə bilər".
Müsahibimiz dedi ki, yerli müəssisələrin maddi-texniki imkanları onlara ildə 70 min ton quş əti istehsal etməyə imkan verir: "Amma bazardakı vəziyyət, quş yemi və dərmanların bahalığı səbəbindən yerli şirkətlər tələbatın təqribən 50 min tonunu ödəyə bilir. Elə buna görə də cəmiyyət yerli quşçuluq müəssisələrinin inkişafı üçün yem, dərman preparatlarının alınmasına əlavə dəyər vergisini ləğv etməyi təklif edib. Hesablamalarımıza görə, əlavə dəyər vergisi ləğv olunsa, ildə 80 min ton quş əti və 1 milyard 35 milyon ədəd toyuq yumurtası almaq mümkün olacaq və yerli istehsalçılar ölkədə quş məhsullarına olan tələbatı tam ödəyə biləcək".
Müstəqil ekspertlər isə kəndlərdə fərdi quşçuluğun inkişaf etdirilməsini, daxili bazarın saf kənd məhsulları ilə təmin edilməsində ən düzgün yol hesab edirlər. Bundan ötrü isə kənd istehsalçılarına mikro kreditlər verilməsi təklif edilir.
Quşçuluğun inkişafı ilə bağlı kreditin ayrılmasına gəlincə, İqtisadi İnkişaf Nazirliyindən bildirdilər ki, bununla bağlı hələ təhlillər aparılır. Sahibkarlığa Kömək Milli Fondu tərəfindən "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı"na uyğun olaraq, yanvar ayında uşaq qidası istehsalının təşkili, südlük istiqamətli heyvandarlıq komplekslərinin, həmçinin kiçik və orta həcmli üzüm emalı müəssisələrinin yaradılması üzrə investisiya layihələrinin güzəştli qaydada maliyyələşdirilməsi məqsədi ilə sahibkarlıq subyektlərindən təkliflərin qəbuluna başlanılıb. Həyata keçiriləcək layihələr regionların inkişafı, iş yerlərinin açılması ixracyönümlü məhsul istehsalı baxımından əhəmiyyətlidir.
Kənd Təsərrüfatı Nazirliyinin ictimaiyyətlə əlaqələr şöbəsinin rəhbəri Murtuzəli Hacıyev dedi ki, ötən il ümumən sahibkarlığın inkişafı üçün 10 milyon manat ayrılıb. Ola bilsin ki, bu il də müəyyən qədər vəsait ayrı-ayrı kəndlərdə fərdi quşçuluğun inkişafına sərf olunsun.

çap üçün verisya