İşsiz statusu alan şəxslərin dövlət tərəfindən müavinətlə təmin olunduğunu bildirən Əmək və Əhalinin Sosial Müdafiəsi Nazirliyi Baş Məşğulluq İdarəsinin rəis müavini Ş.Xələfov onlara iki dəfə iş təklif edildiyini vurğulayır: "Həmin vətəndaşlara münasib iki iş təklif olunur. Əgər vətəndaş həmin iş yerlərində işləmək istəmirsə, onun statusu ləğv olunur. Amma işsiz kimi rəsmi status alan vətəndaş işlə təmin olunmursa, 4 aydan 6-ayadək müavinət alır. Bu müddətdə isə vətəndaş hər ay məşğulluq şöbəsində qeydiyyatdan keçməlidir. Hazırda 5500-dən artıq vətəndaş işsizliyə görə müavinət alır. Ötən il işsizlərə ödənilən müavinətin məbləği 24 manatdan 55 manata qaldırılıb.

Müavinətlərin minimum məbləği 55 manat, maksimum məbləği isə orta aylıq əməkhaqqından yüksək olmamalıdır. Məbləğin minimum əmək haqqına çatdırılması düzgün deyil. Çünki bu halda işləməyə maraq azala bilər. Üstəlik, müavinətlər 6 ay nəzərdə tutulsa da, yaxşı olar ki, işsiz vətəndaş bu müddətdə işlə təmin olunsun və müavinətin verilməsi dayandırılsın".
Ş.Xələfov may ayından başlayaraq respublika ərazisində əmək yarmarkalarının keçiriləcəyini bildirib: "Hazırda əmək bazarının vəziyyəti öyrənilir. Boş iş yerləri barədə məlumatlar toplanılır. May ayından başlayaraq həm bölgələrdə, həm də paytaxtda əmək yarmarkalarının keçirilməsinə başlanılacaq. 2009-cu ildə respublikanın şəhər və rayonlarında keçirilən 56 əmək yarmarkasında 3022 müəssisə 24190 boş iş yerinə işçi axtarıb. Əmək yarmarkaları nəticəsində 8132 nəfər işaxtaran münasib işlə təmin olunub. Bu yarmarkalar vasitəsilə 866 nəfər peşə hazırlığı kurslarına, 419 nəfər isə haqqı ödənilən ictimai işlərə cəlb edilib. İndi müəssisələrdə peşə ixtisası üzrə kadrlara ehtiyac olsa da, belə işçilər tapmaq çətindir. Əvəzində ali təhsilli vətəndaşlar arasında iş axtaranlar daha çoxdur".
Nazirlik rəsmisinin sözlərinə görə, "İşçi tələb olunmur" tipli elanlar işsizlərin sayının artmasının göstəricisi deyil: "Sadəcə, işəgötürənlər peşəkarların işə cəlb olunmasına çalışır. Yəqin ki, həmin şirkətlərin özlərinin də artıq kifayət qədər işçisi var. Ötən il bu məqsədlə təxminən 15 000 müəssisəni əhatə edən təhlil aparılıb. 8 000 müəssisədən verilən məlumata əsasən, gözlənilən ixtisarlar 0,2 faiz ola bilər. Bu da göstərir ki, maliyyə böhranının təsirindən işsizlərin sayının artması olmayıb".
Əmək və Əhalinin Sosial Müdafiəsi Nazirliyinin Dövlət Əmək Müfəttişliyindən bildirdilər ki, tikinti şirkətləri hazırda peşəkarların işə cəlb edilməsinə maraq göstərir: "Hazırda tikinti sahəsinə peşəkarların cəlb edilməsi istiqamətində işlər aparılır. Sovet dövründə peşə məktəbləri fəaliyyət göstərirdi. Buna görə də bütün sahələr üzrə ən azı peşə təhsilli şəxslər çalışırdı. Amma müstəqillik əldə etdikdən sonra vətəndaşlar hansı sahədə iş tapsa, orada işləməyə üstünlük verir. Hazırda isə Əmək və Əhalinin Sosial Müdafiəsi Nazirliyi yanında Baş Məşğulluq İdarəsi tərəfindən yeni ixtisas kursları təşkil edilib. Orada daha çox tələbat olan sahələr üzrə ixtisaslı işçilər hazırlanır. Bundan başqa, Əmək Problemləri İnstitutunda kurslar təşkil edilir. Orada da tikinti sahəsi üçün işçilər hazırlanmasına üstünlük verilir. Lakin işçinin işə götürülməsi hüququ işəgötürənə verilib. İşə qəbul edilən işçinin peşəkarlığı həmin şəxslər tərəfindən yoxlanılmalıdır".
Hazırda Əmək və Əhalinin Sosial Müdafiəsi Nazirliyi əhalinin işlə təminatı üçün müxtəlif tədbirlər üzərində işləyir. Belə bir tədbir hazırlanır ki, kiçik biznesi təşkil etmək üçün işsizə 6 aylıq müavinət qədər, yəni 330 manat pul verilsin. Bunun üçün, məsələn, paltar tikmək və sair kimi evdə fəaliyyət göstərə bilər. İşsiz adam bu xidmətlə məşğulluğunu təmin edə bilər. Bununla yanaşı, nazirlik təklif edir ki, hərbi xidməti başa vurmuş vətəndaşları işə götürmək üçün bəzi müəssisələrə dotasiyalar verilsin. Bu halda işçinin 1 il müddətində əməkhaqqının yarısını sahibkar, yarısını isə dövlət maliyyələşdirəcək. İl başa çatdıqda sahibkarlar həmin şəxsləri işə götürə bilərlər.

Xalid AZƏR.

çap üçün verisya