Eyyub Hüseynov: "Plastik qablardan kimyəvi maddələr ayrılaraq qidaya qarışması təhlükə mənbəyidir"

İmran Abdullayev: "Əgər qabların tərkibində toksinlərin miqdarı normadan artıq olarsa, orqanizmdə ciddi fəsadlar yarada bilər"


Son illər plastik qablaşdırma geniş vüsət alıb. İndi demək olar ki, bütün ticarət obyektlərində istehlakçıların aldıqları mallar polimerdən hazırlanan torbalarda qablaşdırılır. Plastik qablarda satılan sudan içməli olur, plastik stəkan, çəngəldən istifadə etməli oluruq. Bir çox xidmət obyektlərində əhaliyə isti və soyuq xörəklər də plastik qablarda verilir. Qatıq, süd, pendir və digər süd məhsullarının plastik qablarda satılmasına isə artıq çoxdan vərdiş etmişik. Amma fərqində deyilik ki, maliyyə cəhətdən istehsalçılara və xidmət obyektlərinə ucuz başa gələn bu cür qablar bizim sağlamlığımıza necə təsir edir. Bunu nəzərə alan bir çox ölkələr qida məhsullarının plastik qablaşdırılmasını məhdudlaşdırıb. Hətta mağaza və supermarketlərdə işlədilən polimerdən hazırlanan torbalar da kağız torbalarla əvəz edilir. Yediyimiz ərzaqdan tutmuş, geydiyimiz ayaqqabıyadək hər bir malı plastik torbalarda və qablarda almağa bir növ gözümüz öyrəşsə də, çoxumuz bunun ziyanı barədə düşünmürük. Halbuki ekspertlər bunun böyük fəsadlar törədəcəyi ilə bağlı həyəcan təbili çalırlar.
Məsələyə münasibət bildirən Azad İstehlakçılar Birliyinin (AİB) sədri Eyyub Hüseynov da plastik qablaşdırmanın ləğvinin tərəfdarı olduğunu vurğuladı: "Plastik qablardan istifadə insan sağlamlığına zərərdir. Artıq bir çox xarici ölkələrdə, o cümlədən Amerikada plastik qabların istifadəsi qadağan edilib. Bir çox ölkələrdə belə qablar kardon və kağızla əvəzlənib. Amma bu baha başa gəldiyindən ticarət və xidmət obyektləri hələ də plastik qablaşdırmaya üstünlük verir. Dünyanın bir çox ölkələrində içmək üçün istifadə edilən suyun plastik qablarda satışına da qadağa qoyulub. Bu qayda bir sıra Avropa ölkələri ilə yanaşı, keçmiş sovet ölkələrindən bəzilərində də tətbiq edilir. Latviyada plastik qablarla yanaşı, plastik torbalar da ləğv edilib. Bunun əvəzində kağız sellofanlardan istifadə olunur".
E.Hüseynovun qənaətinə görə, ən acınacaqlı məqamlardan biri plasitik qabların təkrar istifadə edilməsidir: "Bəzən həmin qablar zibilliklərə tullandıqdan sonra yığılaraq yenidən istifadə edilir".
Ekspert günəş şüaları altında plastik qablarda su satılmasının da təhlükəli olduğunu bildirdi: "Plastik bir stəkana isti çay və ya digər hər hansı isti bir içki tökdüyümüz zaman istinin təsiri ilə plastik qabın tərkibindəki bəzi kimyəvi maddələr ayrılaraq qidaya qarışır. Ən acınacaqlısı isə odur ki, bir çox hallarda, hətta uşaqlara plastik butulkalarda isti süd və ya çay verilir. Hazırda apteklərdə satışa çıxarılan azyaşlıların qidalandırılması üçün nəzərdə tutulan qabların əksəriyyəti plastikdən hazırlanıb. Demək olar bütün körpələr həmin qablarda olan məhsulla qidalandırılır. Uşaq orqanizminin zərifliyini nəzərə alsaq, bunun onlara nə qədər mənfi təsir göstərəcəyini təsəvvür etmək çətin olmaz".
Respublika Gigiyena və Epidemiologiya Mərkəzinin şöbə müdiri İmran Abdullayev plastik qablardan normalara uyğun istifadə edilməməsini zərərli saydı: "Bunun üçün həmin qabların tərkibi dəqiq yoxlanılmalıdır. Əgər həmin qablar ölkə xaricindən gətirilirsə, normalara uyğun gəlmədiyi halda həmin məhsulların ölkə ərazisindən keçirilməsi qadağandır. Yerli istehsal məhsulu olan plastik qablara da gigiyenik sertifikat alınmalıdır".
İ.Abdullayevin sözlərinə görə, əgər qabların tərkibində toksinlərin miqdarı normadan artıq olarsa, orqanizmdə ciddi fəsadlar yarada bilər".
Ekoloqlar isə hesab edir ki, plastik qablaşdırma insan orqanizmi ilə yanaşı, ətraf mühitə də ciddi zərər vurur. Belə ki, həmin maddələrin çürüməsi üçün təxminən 100 il vaxt lazım olur. Halbuki hər il yüz tonlarla bu cür qablardan istifadə edilərək sonradan zibil poliqonlarına atılır. Deməli, özümüzü və yaşadığımız mühiti qorumaq üçün fikirləşməyə dəyər…

Xalid AZƏR.

çap üçün verisya