Hörmətli dəyirmi masa təşkilatçıları və iştirakçıları!
Xanımlar və cənablar!
Bu bir həqiqətdir ki, bütün cəmiyyətlərdə ölkənin məhsuldar qüvvələrinin mühüm tərkib hissəsi qadınlardır. Analıq kimi mürəkkəb, çətin və şərəfli bir funksiyanı yerinə yetirən qadınların əməyinin cəmiyyət və ailə miqyasında necə və hansı dərəcədə səmərəli təşkil edilməsi hər bir sivil dövlətin sosial siyasət sahəsində çox vacib olan vəzifələrindəndir.
Azərbaycan öz dövlət müstəqilliyini bərpa etdikdən sonra qadınların cəmiyyətdəki rolu və vəzifələri əsaslı şəkildə artdı. Belə ki, bazar iqtisadiyyatının təşəkkül tapması, cəmiyyətin müxtəlif sahələrində aparılan islahatlar, vətəndaş cəmiyyətinin formalaşmasında vətəndaşların fəallığının artırılması yolunda görülən işlər artıq bunu tələb edirdi. Bu baxımdan açıq etiraf edilməlidir ki, qadınlar üçün bəyan edilən bərabər hüquqların təmin olunması bir sıra hallarda real bərabər imkanların olmaması üzündən həyata keçirilə bilmirdi.
Eyni zamanda onu da etiraf etməliyik ki, dövlət strukturları bu məsələ ilə bağlı, yəni mövcud problemlərin aradan götürülməsi üçün mühüm addımlar atmışlar. Qanunvericiliyin yaradılması və təkmilləşdirilməsi, qadınların təşkilatlanması, onların beynəlxalq təşkilatlarda və qurumlarda təmsil olunması, Birləşmiş Millətlər Təşkilatının, Avropa Şurasının, Beynəlxalq Əmək Təşkilatının hüquqi və normativ aktlarına qoşulması və s. bu kimi addımlardandır.
Sözsüz ki, görülən işlər, qarşıda duran problemlər barədə dəyirmi masada geniş müzakirələr aparılacaq və həmin işlər təhlil olunacaqdır.
Mən isə imkandan istifadə edərək, Azərbaycan həmkarlar ittifaqlarında qadın və kişilərin sosial bərabərliyinin təmin edilməsi, qadınların hüquq və mənafelərinin müdafiəsi üzrə görülən işləri qısa da olsa nəzərinizə çatdırmaq istəyirəm.
"Həmkarlar ittifaqları haqqında" Azərbaycan Respublikasının Qanununa müvafiq olaraq həmkarlar ittifaqları təşkilatlarının nizamnamələrində bütün üzvlərin hüquqlarının təmin edilməsi nəzərdə tutulur. Eyni zamanda AHİK tərəfindən "Azərbaycan Respublikasında qadın problemləri üzrə Milli Fəaliyyət Planı"nın həyata keçirilməsində həmkarlar ittifaqlarının iştirakı haqqında", "Gender siyasətinin Konsepsiyası" və sairə sənədlər qəbul edilmişdir. 2006-cı ildə AHİK-də qadın problemləri və gender bərabərliyi üzrə Mərkəz yaradılmışdır. Mərkəzin əsas vəzifəsi kimi həmkarlar ittifaqı təşkilatlarında qadın problemi və gender bərabərliyi ilə məşğul olan məsul şəxslərin, müvafiq şura və komissiyaların hərəkətlərinin əlaqələndirilməsi müəyyən edilmişdir.
Biz gender problemlərinə dövlət və hökumət orqanlarının, işəgötürənlər təşkilatlarının və digər müvafiq qurumların diqqətini cəlb edərək, həmin problemlərin həll edilməsi üçün saziş və kollektiv müqavilələrdən geniş istifadə edirik.
Bunlardan ən önəmlisi Azərbaycan Respublikası Nazirlər Kabineti, Azərbaycan Həmkarlar İttifaqları Konfederasiyası və Azərbaycan Respublikası Sahibkarlar (İşəgötürənlər) Təşkilatlarının Milli Konfederasiyası arasında 2006-2007-ci illər üçün bağlanmış Baş Kollektiv Sazişdir. Burada qadınlar arasında işsizliyin azaldılmasına, qadın işçi qüvvəsinə ehtiyacın artırılmasına yardım edən tədbirlər, daha çox qadın işçilərə tələb olunan turizm və istirahət zonalarının yaradılması və bu sahəyə investisiyaların geniş miqyasda cəlbi, qadınlara yeni peşələrin öyrədilməsi və sairə tədbirlər nəzərdə tutulur.
Bu sənəddə həmçinin Beynəlxalq Əmək Təşkilatının "Ailə öhdəlikləri olan işçilər: kişi və qadın işçilər üçün bərabər rəftar və bərabər imkanlar haqqında" 156 və "Analığın mühafizəsi haqqında" 183 saylı konvensiyalarına qoşulması da öz əksini tapmışdır. Yeri gəlmişkən deyim ki, həmin konvensiyalara AHİK-in rəyi kitabça halında hazırlanıb çap olunmuş və qurumun bütün təşkilatlarına paylanmışdır.
Çıxışımın sonunda dəyirmi masanın təşkilatçılarına səmimi təşəkkürümü bildirir, seminar iştirakçılarına isə səmərəli iş arzulayıram.
Diqqətinizə görə çox sağ olun!

çap üçün verisya