GƏNCLƏR İLİNƏ HƏSR EDİLMİŞ YARADICILIQ DEKADASI DAVAM EDİR

Artıq yarım əsrdir ki, neftçilərin A. İsgəndərov adına mədəniyyət sarayında təsviri sənət studiyası fəaliyyət göstərir. Bu müddət ərzində minlərlə uşaq və yeniyetmə burada rəssamlıq texnikasına yiyələnmiş, fırça və qələmlə işləməyi öyrənmişdir.
1980-ci ildən bu studiyaya Hacırza Məlikov rəhbərlik edir. Hacırza müəllim üçün mədəniyyət sarayı ikinci evə çevrilmişdir. O, 6 yaşından saraya bağlanmışdır. Əvvəlcə rəssamlıq dərnəyinin üzvü olmuş Ə.Əzimzadə adına rəssamlıq məktəbinin heykəltəraşlıq fakültəsini bitirdikdən sonra işə mənimsədiyi sənətin sirlərini burada balaca təsviri incəsənət həvəskarlarına öyrətməyə başlamışdır.
Hazırda studiyada 30 nəfər yeniyetmə və gənc məşğul olur ki, aralarında istedadlı gənclər çoxdur. Burada onlar təsviri incəsənətin tarixi ilə tanış olur, rəssamlıq texnikasına yiyələnirlər.
Hacırza müəllim deyir:
"Sözsüz ki, uşaqların çoxu rəssam olmayacaq. Lakin əsas məqsəd onlarda bu sənətə qarşı məhəbbət, məsuliyyət hissi və intizam tərbiyə etməkdir". Həqiqətən də kollektivdə təlim-tərbiyə və yaradıcılıq işi düzgün aparılır. Tez-tez tərbiyəvi mövzularda söhbətlər, təsviri sənət haqqında mühazirələr, tanınmış rəssamların əsərlərinin müzakirəsi və s. təşkil olunur. Bu cür maraqlı məşğələlər gəncləri kollektivə daha çox cəlb edir.
Studiyanın yetişdirmələri bu gün də kollektivlə əlaqə saxlayırlar. İmkan olduqca studiyanın məşğələlərinə gəlirlər, kollektivin yetirmələrindən olan İnarə Abdullayeva və Cavid Məmmədov Rəssamlıq Akademiyasında qabelendən (milli toxuma) dərs deyirlər. Rövşən Məmmədov Pirallahı adasındakı neft estakadasında rəssam işləyir. Cavid və Tərlan Əliyev qardaşları Memarlıq İnstitutunda işləyirlər. Kollektivin gənc yetirməsi Pərviz İsmayılov isə bu il hərbi xidmətini bitirdikdən sonra yenidən studiyaya qayıtmış, sevdiyi sənətlə məşğul olmağa başlamışdır. O, öz üzərində çalışaraq böyük həvəslə Rəssamlıq Akademiyasına hazırlaşır.
Gənc nəslin estetik tərbiyəsi üzrə apardığı böyük və səmərəli işi, yüksək yaradıcılıq nailiyyətlərini nəzərə alaraq kollektivə 1981-ci ildə "Xalq kollektivi" adı verilmişdir.
Yaradıcılıq nailiyyətlərinə görə studiya dəfələrlə diplom və fəxri fərmanlarla təltif edilmiş, bir çox müsabiqələrin laureatı olmuşdur.
Onlar respublika və rayon üzrə keçirilən tədbirlərdə müntəzəm iştirak edirlər. Novruz bayramında İçərişəhərdə, "Gül bayramı"nda Dənizkənarı Milli Parkda təşkil etdikləri sərgiyə, "Mazut müqaviləsi - 100" müsabiqəsində 1-ci yeri tutduqlarına görə diplom və pul mükafatları almışlar.
Həmkarlar ittifaqlarının gənclər ilinə həsr edilmiş Yaradıcılıq Dekadası çərçivəsində mədəniyyət sarayının təşkil etdiyi "Gənclik - bu gün" sərgisi də tamaşaçılar tərəfindən maraqla qarşılandı.
Sərginin ekspozisiyasında 60-dan çox müxtəlif mövzularda təsviri və tətbiqi sənət əsərləri nümayiş etdirilmişdi. Gənc rəssamların işləri mövzu rəngarəngliyinə görə çox maraqlı idi. Müharibəyə nifrət, doğma təbiətin əsrarəngiz mənzərələri, əmək adamları, idman, incəsənət, respublikada yeni quruculuq işləri - bütün bunlar sərgidə təqdim edilən əsas mövzular idi.
Bu studiyanı artıq respublikadan kənarda da tanıyırlar. Onlar Londonda, İranda, İsveçdə, Türkiyədə keçirilən sərgi və bayramlarda Azərbaycanı layiqincə təmsil ediblər. Amerika səfirliyinin ofisinin divarlarında uşaq hüquqlarına dair panno hazırlamışlar.
İndi studiyanın üzvləri Hindistanda "Shankars" uşaq qalereyasının dekabrın 31-də keçirəcəyi "Dünyanın uşaqları" adlı təsviri və dekorativ sərgiyə hazırlaşırlar.
Təsviri xalq studiyasının yüksək nailiyyətlər qazanmasında mədəniyyət sarayının direktoru Hacı Əliyevin və bədii rəhbər Firuzə Nurməmmədovanın zəhməti böyükdür. Onlar kollektivin işləməsi üçün hər cür şərait yaratmağa çalışır, gənc nəslin estetik tərbiyəsinə böyük diqqət yetirirlər. Noyabrın axırlarında studiyanın 50 yaşı mədəniyyət sarayında böyük təntənə ilə qeyd ediləcək.

Xoşqədəm Bağırova,
AHİK-in mütəxəssisi.

çap üçün verisya