BU FİKİR SAHİBKARLIQ VƏ ELM, ELMİ-İSTEHSALAT MÜƏSSİSƏLƏRİ İŞÇİLƏRİ MÜSTƏQİL HƏMKARLAR İTTİFAQININ V KONFRANSINDA SƏSLƏNMİŞDİR

Konfransda sahə həmkarlar ittifaqı Respublika Komitəsinin sədri Tofiq Quliyevin təşkilatın beşillik fəaliyyəti (2002-ci ilin noyabrından 2007-ci ilin noyabrınadək) barədə hesabatı dinlənilib müzakirə edilmişdir.
Natiq demişdir ki, bu gün iqtisadiyyatın yüksəlişi bilavasitə sahibkarlığın inkişafı ilə sıx bağlıdır. Respublika Komitəsi də fəaliyyətini məhz bu istiqamətdə qurmuşdur. Hesabat dövründə işçilərin sosial-iqtisadi mənafelərinin qorunmasına, istehsalat məişətinin yaxşılaşdırılmasına, əməyin mühafizəsi və təhlükəsizlik texnikasının vəziyyətinə nəzarət edilməsinə, fəhlə və qulluqçuların bilik səviyyəsinin yüksəldilməsinə, həmkarlar ittifaqı işçilərinin və fəallarının təhsilinə daha çox diqqət yetirilmişdir.
Komitə sədri bildirmişdir ki, təşkilat geniş şəbəkəyə malikdir. Ötən beş ildə həyata keçirilmiş məqsədyönlü tədbirlər nəticəsində respublikanın bölgələrində bir sıra şəhər və rayon komitələri, eyni zamanda Bakı şəhərinin rayonlarında birləşmiş həmkarlar ittifaqı komitələri, fəaliyyətə başlayan özəl qurumlarda ilk həmkarlar ittifaqı təşkilatları yaradılmışdır. Hazırda sahə həmkarlar ittifaqı Respublika Komitəsi 2395 ilk təşkilatı və 49708 nəfər Hİ üzvünü birləşdirir.
Hesabat dövründə zonalar üzrə təşkil silsilə seminarlarda kollektiv müqavilələrin bağlanması və götürülən öhdəliklərin yerinə yetirilməsinin yoxlanması qaydarı barədə dinləyicilərə geniş anlayış verilmişdir. Sahə müəssisələrində bağlanmış müqavilələrin sayı artaraq 490-a çatdırılmışdır ki, bu da 29800 nəfər əmək adamının əhatə edilməsi deməkdir.
Konfransda qeyd edilmişdir ki, istər Respublika Komitəsi, istərsə də onun xidmətində olan ilk təşkilatlar hərbi hissələrə, ahıllar evinə vaxtaşırı hamilik köməyi göstərmişlər. Gender bərabərliyi və qadın siyasəti, gənclərlə sıx münasibətlər qurulması yönümündə çoxsaylı tədbirlər həyata keçirilmişdir.
Deyilmişdir ki, qadınlar üçün müvafiq əmək şəraitinin yaradılması, onların sosial təminatlarının həll edilməsi, hüquq və mənafelərinin qorunması müəssisə və təşkilatlarda bağlanmış kollektiv müqavilələrdə öz əksini tapmışdır. Respublika Komitəsi qadın işçilərin sağlamlığının və sosial maraqlarının qorunması, onlara hüquqi yardım göstərilməsi istiqamətində xeyli iş görmüş, yeni iş yerlərinin açılmasına nail olmuşdur.
İstər məruzədə, istərsə də ayrı-ayrı çıxışlarda qeyd edilmişdir ki, sahibkarlıq iqtisadiyyatımız üçün yeni sahə olduğundan işçilərin hüquqlarının qorunmasında və əməyinin mühafizəsində həllini gözləyən problemlər də mövcuddur.
Respublika Komitəsinin nəzdində yaradılmış komissiya tərəfindən aparılmış araşdırmalar göstərmişdir ki, özəl sektorda bəzi sahibkarlar tərəfindən hələ də əmək qanunvericiliyinin pozulması hallarına yol verilir. Məzuniyyətlərin vaxtlı-vaxtında verilməməsi, xəstəlik vərəqələrinə ödənişlərin ödənilməməsi buna əyani sübutdur. "Xəzri" firması rəhbərliyinin qadın işçilərin kollektiv müqavilədə nəzərdə tutulmuş əməkhaqqını azaltmaq cəhdinin qarşısı məhz RK-nın işə qarışması nəticəsində alınmışdır.
Quba rayon komitəsinin sədri Kamil İlyasov daha ağrılı bir məqama toxunmuşdur. Demişdir ki, özəl müəssisələrin əksəriyyətində heç də bütün işçilər rəsmi əmr, sərəncam və qərarla işə qəbul olunmurlar. İşçilərin əksəriyyəti uçotdan gizlədilir. Adları əməkhaqqı cədvəlinə daxil edilmir. Elə bu səbəbdən də Hİ üzvlüyünə qəbul işi çətinləşir və üzvlük haqqını toplamaq müşkül məsələyə çevrilir.
Konfrasda AHİK sədrinin müavini Cavanşir Alxasov çıxış etmişdir.
Konfrans qurumun rəhbər orqanlarını müəyyənləşdirmişdir.
Tofiq Quliyev yenidən Respublika Komitəsinin sədri, Zemfira Bünyatova isə müavin seçilmişlər.
Konfrans Respublika Komitəsinin Nizamnaməsinə əlavələr və dəyişikliklər etmişdir.
Yığıncaqda təşkilatın 2007-2012-ci illər üzrə fəaliyyətinin əsas istiqamətləri qəbul olunmuş və AHİK-in III qurultayına nümayəndələr seçilmişdir.

çap üçün verisya