Dəmiryolçuların Müstəqil Həmkarlar İttifaqı Respublika Komitəsinin V plenumunda "Azərbaycan Dövlət Dəmir Yolu rəhbərliyi ilə Dəmiryolçuların Müstəqil Həmkarlar İttifaqı Respublika Komitəsi arasında 2005-2007-ci illər üçün Yolun sosial inkişafı üzrə bağlanmış sazişin yerinə yetirilməsi" və "AHİK-in III qurultayına nümayəndələrin, AHİK-in Məclisinə və İcraiyyə Komitəsinə üzvlərin seçilməsi" haqqında məsələ müzakirə edilmişdir.
Plenumu MHİRK sədri Fəzail Bağırov açmış, yığıncağın mahiyyətini vurğulamışdır.
Birinci məsələ ilə əlaqədar Respublika Komitəsinın təşkilat şöbəsinin müdiri Samir Böyükzadənin məruzəsi dinlənilmişdir. O demişdir ki, sahə həmkarlar ittifaqının Respublika Komitəsi əmək qanunvericiliyinə əsaslanaraq işçilərin sosial-iqtisadi mənafelərinin və hüquqlarının müdafiəsini, onların maddi-rifah halının yaxşılaşdırılmasını daim ön plana çəkmişdir. Müzakirəyə çıxardığımız saziş də bu məqsədlərə xidmət etmişdir.
Şöbə müdiri demişdir ki, 5 bölmədən və 49 bənddən ibarət olan Sazişin yerinə yetirilməsi həm Yol rəhbərliyi, həm də həmkarlar ittifaqı tərəfindən nəzarətdə saxlanılmışdır. Bunun müsbət nəticəsi kimi qeyd etmək olar ki, Sazişin 46 bəndi tam yerinə yetirilmişdir. Yük və sərnişin daşınması üzrə öhdəliklərə artıqlaması ilə əməl olunmuşdur.
Qeyd edilmişdir ki, Sazişdə yerinə yetirilməyən öhdəliklərdən biri III bölmənin 6-cı bəndidir. Bu bəndə əsasən işçilərə ilin yekunlarına görə birdəfəlik mükafat ödənilməlidir. Lakin bu öhdəlik maliyyə vəsaitinin çatışmazlığından təmin edilməmişdir. Ona görə də, növbəti Saziş bağlanarkən bu bəndin çıxarılması məqsədəuyğun sayılmışdır.
Bəzi birlik və müəssisələrdə növbə ilə işləyən işçilərə iş vaxtından artıq iş saatlarına görə əməkhaqqı düzgün ödənilməmişdir. Bu da sazişin III bölməsinin I bəndinin pozulması deməkdir. İşçilərin vəfatı ilə əlaqədar əmək müqavilələrinə xitam verilərkən onların ailə üzvlərinə düşən orta aylıq əməkhaqqının üç misli miqdarında müavinətin, pensiya yaşında işdən azad olunan işçilərə uzunmüddətli və qüsursuz iş stajına görə ödənilən birdəfəlik mükafatın və sairənin ödənilməsində nöqsanlara yol verilmişdir.
S. Böyükzadə əməyin mühafizəsi ilə əlaqədar götürülmüş öhdəliklərin yerinə yetirilməsi istiqamətində görülmüş işlərə də aydınlıq gətirmişdir. Demişdir ki, Yol rəhbərliyinin yaxından köməyi və Müstəqil HİRK-in ciddi nəzarəti altında keçıirilmiş məqsədyönlü tədbirlər nəticəsində istehsalat hadisələrinin sayı xeyli azalmışdır.
Əməkçilərin sağlamlığının qorunması, istirahətlərinin mənalı təşkil olunması, mədəni-kütləvi tədbirlərin yerinə yetirilməsi ilə əlaqədar götürülmüş öhdəliklər də layiqincə yerinə yetirilmişdir.
Plenum müzakirəyə çıxarılmış hər iki məsələ barədə müvafiq qərarlar qəbul etmişdir.
Sazişin müddətinin bitməsi ilə əlaqədar 2008-2010-cu illər üçün yeni Sazişin bu ilin sonunadək bağlanması tövsiyə edilmişdir.
Plenumun qərarı ilə Azərbaycan Həmkarlar İttifaqları Konfederasiyasının III qurultayına 15 nümayəndə, AHİK-in Məclisinə 5, İcraiyyə Komitəsinə 1 nəfər üzv seçilmişdir.
AHİK-in III qurultayında Azərbaycan Həmkarlar İttifaqları Konfederasiyasının sədri vəzifəsinə Səttar Suliddin oğlu Mehbalıyevin namizədliyinin irəli sürülməsi tövsiyə olunmuşdur.
Plenumda AHİK-in katibi, aparat rəhbəri Həsən Cəfərov və ADDU-nun baş mühəndisi Qurban Nəzirov çıxış etmişlər.
H. Cəfərov demişdir ki, müzakirəyə çıxarılmış məsələlər həm AHİK, həm də dəmiryolçular üçün çox önəmlidir. Əldə edilmiş nailiyyətlər istər Dəmir Yolu, istərsə də həmkarlar ittifaqı rəhbərliyinin sıx, konstruktiv əməkdaşlığının bariz nümunəsidir.
Gələn il fevral ayının 5-6-da Konfederasiyanın III qurultayı keçiriləcəkdir. Çox xoşdur ki, seçilən nümayəndələrə qurultayda hörmətli sədrimiz Səttar Mehbalıyevin namizədliyinin irəli sürülməsi və dəstəklənməsi tövsiyə olundu.
Bu bizi çox sevindirir. Çünki Konfederasiyanın gördüyü işlər göz önündədir. Son illərdə qanunvericilik sahəsində Konfederasiyanın əldə etdiyi nailiyyətlər S.Mehbalıyevin adı ilə bağlıdır. O, həm AHİK sədri, həm də millət vəkili kimi fəaliyyət göstərir. Çox istərdik ki, qurultayla bağlı yerlərdə hər bir həmkarlar ittifaqı fəalı beş il ərzində görülmüş işlərə obyektiv qiymət versin və təkliflərini AHİK- ə göndərsin. Əldə olunmuş müsbət nəticələrlə yanaşı, hansısa çatışmazlığın, gələcəkdə nə kimi işlərin görülməsinə ehtiyac olduğunu bilərək təkliflərini Konfederasiyanın müvafiq orqanları vasitəsilə AHİK-ə çatdırsın. H.Cəfərov daha sonra demişdir ki, Konfederasiyanın gələn beşillik üçün onun əsas fəaliyyət istiqamətləri müəyyənləşdirilmişdir. Bu, artıq layihə formasında öz əksini tapmışdır. Azərbaycan həmkarlar ittifaqlarının orqanı olan "Ülfət" qəzetində yeni rubrika açılmışdır. İstərdik ki, arzu və təkliflərinizi, həmkarlar ittifaqlarına, Konfederasiyaya olan münasibətinizi həmin rubrika vasitəsilə bildirəsiniz. Qurultaya hazırlıq mərhələsində hər bir təklif nəzərə alınacaq, gələcək fəaliyyətimizin istiqamətlərində öz əksini tapacaqdır.

çap üçün verisya