Elektroenergetika və Elektrotexnika Sənayesi İşçiləri Həmkarlar İttifaqının XVII konfransı keçirilmişdir. Respublika Komitəsinin sədri Rafiq İldarovun sahə həmkarlar ittifaqının XVI konfransından keçən dövr ərzində qurumun fəaliyyəti barədə hesabatı dinlənilib müzakirə edilmişdir.
R. İldarov demişdir ki, Respublika Komitəsinin II plenumu AHİK-in ikinci qurultayında qəbul edilmiş "Azərbaycan Həmkarlar İttifaqlarının fəaliyyətinin Əsas İstiqamətləri"nin və sahə həmkarlar ittifaqı XVI konfransının qərarlarının həyata keçirilməsi üzrə 2003-2007-ci illər üçün 25 bənddən ibarət tədbirlər planı təsdiq etmişdir. Respublika Komitəsi bütün istiqamətlərdə öz fəaliyyətini məhz həmin sənədin icrası üzərində qurmuşdur.
Deyilmişdir ki, hesabat dövründə Respublika Komitəsinin 6 plenumu, Rəyasət Heyətinin isə 22 iclası keçirilmişdir. Bu plenum və iclaslarda həmkarlar ittifaqının təşkilati strukturunun təkmilləşdirilməsinə, Hİ üzvlərinin əmək, sosial-iqtisadi hüquqlarının və mənafelərinin müdafiəsinə, əməyin mühafizəsinə, mədəni-kütləvi və idman tədbirlərinin keçirilməsinə, uşaq, gənclər və qadın problemlərinin həll edilməsinə, şəhid və qaçqın ailələrinə diqqətin artırılmasına yönəldilmiş məsələlər müzakirə olunmuş, müvafiq qərarlar qəbul edilmiş və onların icrası təmin olunmuşdur. Rəyasət Heyətinin iclaslarında həmçinin ilk təşkilatların həmkarlar ittifaqı komitələrinin fəaliyyətləri haqqında hesabatlar dinlənilmiş, onların müsbət təcrübələrinin öyrənilməsi və yayılması HİK-lərə tövsiyə edilmişdir.
Respublika Komitəsi struktur dəyişiklikləri aparmış, yeni yaranan ilk təşkilatlarda təsis konfransları keçirilmişdir.
Kadrların təhsilindən söz açan natiq vurğulamışdır ki, Respublika Komitəsi HİK sədrlərinin və fəallarının tədrisinə xüsusi diqqət yetirmişdir. Respublika Komitəsinin yanında Tədris Şurası yaradılmışdır. Yeni seçilmiş HİK sədrləri üçün Əmək və Sosial Münasibətlər Akademiyasında 3 günlük kurslar təşkil edilmişdir. Komitə sədrlərinin başqa sahələrin, digər ölkələrin, beynəlxalq təşkilatların iş təcrübələrindən bəhrələnmələrinə də diqqət yetirilmişdir. İstər respublikanın paytaxtında, istərsə də bölgələrdə təşkilati işlərə, əməyin mühafizəsinə, maliyyə işinə, gender siyasətinə və digər mövzulara dair zona və ümumi sahə seminarları keçirilmişdir.
Natiq qeyd etmişdir ki, hesabat dövründə Respublika Komitəsi ilə "Azərenerji" Açıq Səhmdar Cəmiyyətinin rəhbərliyi arasında sahə (tarif) kollektiv sazişləri bağlanmışdır. Sosial partnyorluq əsasında ikitərəfli komissiyalar tərəfindən hazırlanmış bu sazişlər işəgötürənlə işçi arasında əmək, iqtisadi və sosial münasibətlərin tənzimlənməsində mühüm rol oynamışdır. İşçilərin xeyrinə olan öhdəliklər ildən-ilə artırılmış və ən əsası odur ki, bu müddəaların əksəriyyəti işəgötürənlər tərəfindən yerinə yetirilmişdir. RK sədrinin sözlərinə görə, hazırda 2008-2009-cu illər üçün sahə (tarif) kollektiv sazişin bağlanmasına dair "Azərenerji" ASC ilə danışıqlar aparılır.
Konfransda həmçinin Respublika Komitəsinin əməyin mühafizəsi, sağlam iş şəraitinin yaradılması, işçilərin xüsusi geyim və mühafizə vasitələri ilə müntəzəm təmin edilməsi, energetiklərin sağlamlığının qorunması və istirahətlərinin təşkili, idmana marağın artırılması, qadın əməyinə qayğı göstərilməsi və s. məsələlərin həlli yönümündə gördüyü işlərdən də danışılmışdır.
Hesabat məruzəsində görülmüş çoxsaylı işlərlə yanaşı, sahədə olan problemlər də gündəmə gətirilmişdir.
İşçilərin peşə xəstəliklərindən və istehsalatla bağlı bədbəxt hadisələrdən sosial sığortalanması hələlik öz həllini tapmamışdır. Zərərli işlərdə çalışanlar pulsuz müalicəvi yeməklə, südlə hələ ki, tam təmin edilməmişlər.
Yığıncaqda deyilmiş bir fakt daha çox narahatlıq doğurmuşdur. Qeyd edilmişdir ki, ölümlə nəticələnən bədbəxt hadisələrin sayının kəskin surətdə azaldılmasına hələ nail olunmamışdır. Belə hadisələrin əksəriyyəti paylayıcı şəbəkələrdə baş vermişdir. Buna da səbəb iş prosesində işçilərin təhlükəsizlik texnikası qaydalarına riayət etməməsi, ehtiyatsızlıq və səhlənkarlıq göstərməsi və s. amillər olmuşdur.
Konfrans bu və digər nöqsan və problemlərin aradan qaldırılması, layiqli iş yerlərinin yaradılmasına nail olunması barədə işgüzar qərar qəbul etmişdir.
Sahə həmkarlar ittifaqı təftiş komissiyasının hesabatı dinlənilmiş, nizamnaməyə dəyişikliklər edilmişdir.
Konfransda AHİK sədri, millət vəkili Səttar Mehbalıyev çıxış etmişdir. Natiq sahə həmkarlar ittifaqı Respublika Komitəsi ilə "Azərenerji" ASC rəhbərliyi arasında yaranmış işgüzar münasibəti təqdir etmiş, bağlanmış kollektiv sazişlərin energetiklərin sosial məsələlərinin həllinə köklü təsir göstərdiyini vurğulamışdır. Ümidvar olduğunu bildirmişdir ki, növbəti illər üçün bağlanacaq sahə kollektiv saziş daha sosial yönümlü olacaq, həmkarlar ittifaqının təklifləri sənəddə öz əksini tapacaqdır. Konfederasiya sədri bildirmişdir ki, hazırda Azərbaycan Həmkarlar İttifaqları Konfederasiyası tərəfindən qarşıdakı illər üçün Baş Kollektiv Sazişin layihəsi üzərində iş aparılır.
AHİK sədri yeni bağlanacaq kollektiv sazişin və müqavilələrin yerlərdə geniş müzakirəsinin aparılması, aşkarlığın təmin edilməsi, işçilərin ərizə və şikayətlərinə qayğı ilə yanaşılması və s. məsələlər barədə yığıncaq iştirakçılarına tövsiyələr vermişdir.
Konfrans qurumun rəhbər orqanlarını müəyyənləşdirmişdir.
Rafiq İldarov yenidən Elektroenergetika və Elektrotexnika Sənayesi İşçiləri Həmkarlar İttifaqı Respublika Komitəsinin sədri seçilmişdir.
Azərbaycan Həmkarlar İttifaqları Konfederasiyasının III qurultayına nümayəndələr, Məclisin tərkibinə və İcraiyyə Komitəsinə üzvlər seçilmişdir.
Konfransda yekdil səslə qərara alınmışdır ki, qurultayda Konfederasiyanın sədri vəzifəsinə Səttar Mehbalıyevin namizədliyi irəli sürülsün.

çap üçün verisya