Bunları və sonra ətraflı təqdim edəcəyim səbəbləri mənə Ramiz müəllim danışırdı. R.Zeynalov Bakı Elektrik Şəbəkə Açıq Səhmdar Cəmiyyəti Həmkarlar İttifaqı Komitəsinin sədridir. Uzun illərdir ki, sədri olduğu komitə fəaliyyətinin böyük bir hissəsini şəhid ailələrinə, Qarabağ müharibəsi, Çernobıl əlillərinə həsr edir.
Şəbəkə 20 Yanvar hadisələrində, ermənilərə qarşı döyüşdə xeyli sayda şəhid verib. İşçilərinin bir qismi Çernobılda, vətən torpaqlarının müdafiəsində əlil olub. Ramiz müəllim mənə dedi ki, onların hər biri fəxr yerimizdir. Belə insanlara qayğı göstərməmək, el dili ilə desək, nazlarını çəkməmək ən azı insani hissləri itirmək deməkdir.
Nə gizlədim, söhbətin belə başlanğıcı məndə elə təsəvvür yaratdı ki, Ramiz müəllim ya qəlbən kövrək, bir qədər romantik adamdır, ya da bəlağətli danışmağı sevir. Amma söhbət uzandıqca ilk təəssüratımın yanlış olduğuna görə düzü içimdə özüm-özümü tələsik hökm çıxarmağıma görə danladım.
R.Zeynalov itirdikləri qəhrəman iş yoldaşlarının bir-bir adını çəkir. Hüznlə onları xatırlayır. Sonra üzündə kədəri, təəssüfü təbəssüm əvəzləyir… Cəmil Məmmədov Qarabağ üçün canını verdi. Həyat yoldaşı Mətanət Əliyeva mehrini bizə bağladı. Vaxt keçdikcə həmkarlar ittifaqı komitəsinə, ata evi qədər olmasa da, doğmalaşdı. Çoxlarına etibar etmədiyi sözünü-söhbətini əməkdaşlarımıza dedi. Kədərini, sevincini ərklə bizimlə böldü. Biz də Mətanət xanıma mənəvi dayaq olmağa çalışdıq. Doğma adamlar kimi yanında olmağı özümüzə borc saydıq. İmkanımız daxilində maddi köməklik göstərdik. Oğlu Emin, maşallah, boya-başa çatıb. Yeri gəlmişkən, onu öz övladlarımızdan ayırmamışıq. Hazırda hərbi xidmətdədir. Eminin əsgərliyə yolasalma mərasimində bizi yuxarı başda əyləşdirdilər. Mətanət bacı deyir ki, Ramiz qardaş, Allah qoysa, Emin sağ-salamat qayıtsın gəlsin, elçiliyini özün edəcəksən.
Rəhmətlik Rövşən Məmmədov Qarabağın ilk müdafiəsinə qalxan oğullarımızın sırasında əlinə silah almışdı. 1992-ci ildə şəhidlik zirvəsinə yüksəldi. Yadigarı Aytən balanı himayəmizə götürdük. Həyat yoldaşı Qəlbizər xanım Hümbətovanı komitəyə dəvət etdik. Ovundurmağa çalışdıq. Xahiş etdik ki, istədiyi vaxt qapımızı ərklə açsın. Nə sözü, problemi olsa, bizə deməkdən çəkinməsin. Özümüz də vaxtaşırı yığışıb bu ailəyə baş çəkirdik.
Başqa bir Qarabağ müharibəsi şəhidi Rüstəm Süleymanovun da həyat yoldaşı İradə xanım, övladları Muxtar, Lalə həmkarlar ittifaqı komitəsinin daima diqqət dairəsindədir.
Xətai Rayon Şəbəkə Enerji İstismar İdarəsinin elektrik-çilingəri Ağahəsən Ağahüseynov 20 Yanvar faciəsi zamanı qəhrəmancasına həlak olub. Şəhidlər Xiyabanında dəfn edilib. O zaman oğlu Bəxtiyarın 2, Səbuhinin 1 yaşı vardı. Həyat yoldaşı Zenfira Axundovanın üzərinə məsuliyyətli iş düşürdü: uşaqları böyüdüb boya-başa çatdırmaq. Tək qadın üçün bu, çox çətin idi. Tibb bacısı işlədiyindən məvacibi bir o qədər yüksək deyildi. Ananın köməyinə şəbəkənin həmkarlar ittifaqı komitəsi gəldi. Komitə idarə müdiriyyəti qarşısında məsələ qaldırdı ki, hər ay hər bir uşağa ayrılıqda müəyyən məbləğdə pul verilsin. Bundan əlavə, milli, dini bayramlarda işçilərə ayrılan pul, ərzaq yardımları eyni həcmdə 20 Yanvar, şəhid ailələrinə, Qarabağ, Çernobıl əlillərinə göstərilsin. İldönümlərində idarənin nümayəndələrinin iştirakı ilə həmkarlar ittifaqı təşkilatının rəhbərliyi şəhidlərin məzarını ziyarət edir. Onların qəbri üstünə tər-çiçək dəstələri qoyur. Yeni ildə bu kateqoriyalardan olanların kiçikyaşlı uşaqlarına yolka şənliklərinə biletlər alınıb verilir.
Dərs illəri ərəfəsində işçilərin birinci sinifə gedən uşaqlarına təntənəli şəkildə məktəb ləvazimatları yığılmış çantalar hədiyyə olunur. İdarə işçilərinin I kursa daxil olan övladlarının hərəsinə isə nağd 100 manat paylanır. Bu hədiyyələr, yardımlar şəhid ailələrinin, Qarabağ, Çernobıl əlillərinin uşaqlarına da aid edilir. Onlar da idarənin tam, bərabərhüquqlu işçiləri kimi bu aksiyaların keçirildiyi təntənəli mərasimlərə dəvət olunurlar.
AHİK-in III qurultayı ərəfəsində şəbəkə həmkarlar ittifaqı komitəsi daha bir yaddaqalan, xeyirxah təşəbbüsünü reallaşdırdı. 20 Yanvar şəhidlərinin ailələri, Qarabağ, Çernobıl əlilləri, Qarabağ Müharibəsi Veteranları Respublika Cəmiyyətinin nümayəndələri üçün şənlik məclisi düzənləndi. Məclisə idarənin hərbi xidmətdə olan gənc işçiləri də dəvət edilmişdilər.
Ramiz müəllim deyir ki, istər komitədə, istərsə iş başında, istərsə də ailələrində işçilərimizlə, himayəmizdə olan şəhid balaları, vətən uğrunda sağlamlığını itirmiş keçmiş energetiklərlə görüşlər zamanı keçirdiyimiz hissləri, aldığımız mənəvi zövqü, o insanların bizə qarşı isti münasibətini, məhəbbətini, gözlərində yaranan ümidləri, sadəcə, görmək lazımdır.

Bəyalı SAFAOĞLU.

çap üçün verisya